Gjer ein skilnad for barn – bli frivillig på ferieleir

Ferieopphalda vert arrangert i samarbeid med leirskulen på staden og gjev familiar gratis opphald med overnatting, dekka måltid og aktivitetar. Mellom 10 og 20 familiar deltek på kvar leir. Familiane bur på eigne familierom på internat eller hus/hytter.  

Frivillige frå Røde Kors og tilsette ved leirskulen har i oppgåve å fylle veka med aktivitetar i trygge rammer for gjestane. Frivilliggruppa består av ein frivillig leirsjef saman med eit frivilliglag på 5-15 personar alt etter kor stor ferieleiren er. I tillegg er det 2-3 tilsette som bidreg, samt frivillige elevassistentar frå United World College.  

Leirveka byr på aktive dagar med mykje utandørs aktivitet uansett ver. Dagane er organisert med program for felles måltid, varierte aktivitetar inne og ute, og sosialt samvære, leik og fritid på ettermiddag og kveldstid.  

Foreldra har sjølv ansvar for barna sine under heile opphaldet, og det er forventa at dei vaksne deltek i aktivitetane saman med barna. Ettersom det er mange som deltek, må familiane klare seg utan tett oppfølging frå dei frivillige.  

Frivillige har eigne rom, men overnattar i same hus som familiane. Reise, kost og losji for frivillige blir dekka.  

Alle frivillige og tilsette på leiropphaldet er underlagt teieplikt. Røde Kors har teikna kollektiv ulukkesforsikring som gjeld alle frivillige som er registrert deltakar i aktiviteten Ferie for alle. 

For kvart leiropphald er det utarbeidd ein beredskapsplan for uventa hendingar. På kvar leir er det ein leirsjef som har hovudansvar for alt som skjer på leiren og som er næraste kontaktperson for alle dei frivillige. Det er faste møtepunkt  kvar dag for dei frivillige der ein fordeler oppgåver og tek føre seg det som har skjedd eller skal skje. 

Ferieleirane er rusfrie, og det er nulltoleranse for rasisme, vald, mobbing og trugslar. Brot på reglar kan medføre heimreise, erstatningsansvar eller utestenging frå framtidige ferieopphald.

Tilbodet gjeld for barn og familiar busette i Sogn og Fjordane som over tid har hatt utfordringar i kvardagen knytt til svak økonomi. 

Det er tilsette i hjelpeapparatet rundt familiane som vel ut familiar som er i målgruppa og som vurderer kven som har størst behov for gratis ferietilbod og som søker plass på vegner av familien. Det kan vere tilsette i NAV, helsetenesta, familiekontor, barnevern, flyktningtenesta, krisesenter eller andre offentlege hjelpeinstansar.  

Det er eit mål at alle familiar som kvalifiserer til inntak skal kunne kjenne til ferie-tilbodet frå Røde Kors og få moglegheit til å søke plass.  

Del gjerne ut brosjyrar om dei ulike leirane til familiar i målgruppa.  

• Skriv ut folder om vinterleir (vel landskap/liggande format, dobbeltsidig, vendt på kortside)  
• Skriv ut brosjyre om sommarleir

Kvifor skal eg bli frivillig på Ferie for alle?  

Over 200 barn i Sogn og Fjordane får kvart år ei ferieoppleving gjennom Røde Kors og frivillige sin innsats.  Å vere frivillig betyr at du gjer ein innsats for andre utan å få betalt for det. Du gjev av tida di, men får også mykje tilbake.  

Dei fleste som er frivillige opplever arbeidet som meiningsfullt og personleg utviklande. Du veks som person, lærer deg nytt, og møter mange nye menneske. Både dei frivillige som er saman med deg, og menneska som deltek i aktiviteten. Som frivillig på Ferie for alle gjer du ein skilnad for barnefamiliar som har ein utfordrande kvardag, og det ein innsats som er ubetale.  

Kva inneber det å vere frivillig på ferieleir?  

Sogn og Fjordane Røde Kors arrangerer ferieleir i vinter-, -sommar og haustferien og på to ulike lokasjonar. Oppgåvene varierer avhengig av kva leir du er med på. Som frivillig bur du saman med familiane (på eige rom) under opphaldet.  

Den viktigaste rolla som frivillig er å vere der for familiane og sørge for trivsel, hjelp og støtte i trygge rammer med vekt på fellesskap med andre familiar, meistring, sosial inkludering, pleie av relasjonar og positive ferieopplevingar.  

På kvar leir er det ein eigen leirsjef som har ansvar for alle dei frivillige og sørger for at alle trivast og er kjend med kva oppgåver som skal løysast av kven og korleis.  

Kor mykje tid må eg berekne for å vere med som frivillig på Ferie for alle?

For å vere med som frivillig på ferieleir gjer ein avtale på førehand om kor mykje tid ein kan binde seg til å bidra. I utgangspunktet er det ønskeleg at frivillige deltek på fulle ferieveker. Nye ferie-frivillige må delta på obligatorisk opplæring før leirstart for å gjere seg kjent med organisering og førebu seg. men det er også mogleg å bidra kortare eller lengre opphald. Kvar enkelt avgjer i kva grad ein kan bidra.  

Treng eg erfaring eller kompetanse frå liknande aktivitet?  

Nei du treng ingen forkunnskapar for å vere med som frivillig på ferieleir. Derimot er ditt engasjement og initiativ viktig, sameleis med dine personlege eigenskapar og haldningar for t.d. korleis du møte ulike menneske. Alle nye får kurs og opplæring for å kjenne seg trygge i rolla som frivillig.  

Vi treng frivillige med ulik bakgrunn og erfaring. For nokre roller på ferieleiren vil det vere behov for leiareigenskapar, eller t.d. livreddarkompetanse i sjø og vatn, for andre held det å snakke med feriegjestene og sørge for at dei  kjenner seg ivaretekne og trivast.  

Må eg vere med i Røde Kors som frivillig eller vere Røde Kors medlem for å kunne bidra på ferieleir? 

Nei det er ikkje eit krav om å vere frivillig frå før eller å vere medlem i Røde Kors for å kunne bli med som frivillig på ferieleir. Når du registrerer interesse som frivillig på Ferie for alle, vert du kontakta for å avgjere om dette passar for deg. Om det er ein match, vil du bli registrert som frivillig på Ferie for alle-aktiviteten, og må gjennomføre eit obligatorisk startkurs som gir alle frivillige ein felles start og velkomst i Røde Kors.   

Det er ikkje krav til at du deltek som frivillig på anna enn Ferie for alle, eller at du held fram som frivillig etter eit leiropphald. Men du vert registrert som frivillig når du vert registrert i ein aktivitet og du gjer ein frivillig innsats minimum ein gong i året.