Søk opphald for familiar

Tilbodet gjeld for barn og familiar busett i Sogn og Fjordane som over tid har strevd økonomisk.  

Vi ønskjer at de formidlar dette tilbodet til alle som jobbar med barnefamiliar som har utfordringar i kvardagen knytt til svak økonomi. Det kan vere kollegaer i NAV, helsetenesta, familiekontor, barnevern, flyktningtenesta, krisesenter eller andre offentlege hjelpeinstansar.  

Det er eit mål at alle familiar som kvalifiserer til inntak skal kunne kjenne til ferie-tilbodet frå Røde Kors og få moglegheit til å søke plass.  

Del gjerne ut brosjyrar om dei ulike leirane til familiar i målgruppa.  

Ferieopphalda vert arrangert i samarbeid med leirskular på staden og inkluderer gratis opphald med overnatting, dekka måltid og aktivitetar. Familiane bur på eigne familierom på internat eller hus/ hytter. Det vert tilbydd felles transport frå næraste knutepunkt for familiar som ikkje kan køyre sjølv.  

Frivillige frå Røde Kors og tilsette ved leirskulen har i oppgåve å fylle veka med aktivitetar i trygge rammer for gjestane. Foreldra har sjølv ansvar for barna sine under heile opphaldet, og det er forventa at dei vaksne deltek i aktivitetane saman med barna.

Leirveka byr på aktive dagar med mykje utandørs aktivitet uansett ver. Dagane er organisert med program for felles måltid, varierte aktivitetar inne og ute, og sosialt samvære, leik og fritid på ettermiddag og kveldstid.  

For at leirane skal vere forsvarlege og trygge for alle, ber vi om at minst éin føresett kan snakke og forstå norsk. Om nei, MÅ vi ha beskjed og få opplyst kva språk den vaksne kan bruke slik at frivillige kan vere budde. Dette gjeld også i tilfelle der familiane har utfordringar som treng tilrettelegging. Ettersom det er mange som deltek, må familiane klare seg utan tett oppfølging frå dei frivillige. Alle frivillige og tilsette på leiropphaldet er underlagt teieplikt.  

Ferieleirane skal vere rusfrie, og det er nulltoleranse for rasisme, vald, mobbing og trugslar. Brot på reglar kan medføre heimreise, erstatningsansvar eller utestenging frå framtidige ferieopphald.  

UWC har eiga gjesteforsikring. Deltakarane må sjølv ha reiseforsikring. 

Del gjerne ut brosjyrar om dei ulike leirane til familiar i målgruppa.

• Klikk her for å skrive ut brosjyre om sommarleir
• Klikk her for å skrive ut brosjyre om vinterleir

Søknadsskjema skal fyllast ut av påmeldar/tilsett i kommunen. Det er tilsette i hjelpeapparatet rundt familiane som kjenner til og kan vurdere kven som er i målgruppa og som bør få tilbod om gratis ferieopphald. Familiar og privatpersonar kan ikkje søke plass på eigne eller andre sine vegner. 

Søknadsskjemaet opnar i minst seks veker før gjeldande leiropphald.  

Søk plass for familiar

Alle postmottak i kommunane i fylket får tilsendt skriftleg brev med orientering om Sogn og Fjordane Røde Kors sine leiropphald. Det vert også sendt ut e-post til kontaktar som ønskjer å få tilsendt informasjon direkte.

Meld frå om du ønskjer å stå på adresselista for å motta informasjon om leirtilbodet.  

Som påmeldar har du ansvar for å vere kontaktledd mellom tilbydar og familiane det vert søkt på vegner av. 

Steg 1: Påmeldar opprettar dialog med familiar som er i målgruppa som innfrir opptak og som vert vurdert at kan ha behov for eit gratis ferieopphald. I samtale med familien, vert det avgjort om familien ønsker å søke plass på ferieleir.  

Steg 2: Påmeldar opprettar søknad på vegner av familien i søknadsportalen. For å kunne sende inn søknad, må følgjande opplysningar om familien registrerast: 

• namn, alder og kjønn på alle i familien som vil delta  

• adresse, e-post og telefonnr. til éin føresett 

• kva ferieopphald som er aktuelle å delta på  

• om familien har deltatt før, eller har søkt og fått avslag tidlegare 

• om nokon i familien har behov for tilrettelegging grunna fysiske, psykiske eller andre utfordringar 

• om familien skal ha med assistent eller tolk under opphaldet 

• om minst éin føresett som skal delta kan snakke og forstå norsk 

• om familien gjev løyve til at Røde Kors kan ta kontakt dersom det skulle dukke opp andre relevante tilbod 

Dersom påmeldar vil søke på vegner av familiar som er busette på skjult adresse eller skal ha skjult identitet, kan ein legge til deltakarar utan fullt namn og kontaktopplysningar. Påmeldar kan registrere søknad og vert kontakta for nærare avklaringar.  

Røde Kors har strenge reglar for å ivareta familiane sine personopplysningar, og alle frivillige som er med på Ferie for alle er underlagt teieplikt. Sjå personvernerklæring for nærare skildring av handsaming av persondata. 

Påmeldar får stadfesta til oppgjeven e-postadresse at søknad er sendt inn.  

Steg 3: Sogn og Fjordane Røde Kors går igjennom mottekne søknader og vurderer i kva grad familiane innfrir inntakskriteria og har rett til plass. 

Kvalifiserte søkarar vert vekta på grunnlag av interesseavveging for å sikre variert deltaking og m.a. at familiar som ikkje har deltatt tidlegare vert prioritert. Ved behov for ytterlegare opplysningar om familiane eller søknaden, vert påmeldar kontakta. 

Steg 4: Påmeldar får beskjed om kven som har fått tildelt plass i første inntaksrunde. Familiar som ikkje får plass i første omgang, vert sett på venteliste.  

Påmeldar kontaktar familiar som har fått plass og får stadfesta om familiar ønskjer å takke ja til tildelt leiropphald. Påmeldar registrerer svar i søknadsportalen.  

Steg 5: Sogn og Fjordane Røde Kors går igjennom mottekne svar fortløpande. Ved ledige plassar, vert det sendt ut tilbod til familiar på venteliste.  

Steg 6: Påmeldar får beskjed om kven som har fått tildelt plass i andre inntaksrunde. Påmeldar kontaktar familiar og får stadfesta om familiar ønskjer å takke ja til tildelt leiropphald. Påmeldar registrerer svar i søknadsportalen.  

Steg 7: Sogn og Fjordane Røde Kors går igjennom mottekne svar fortløpande på andre inntaksrunde. Om det framleis er ledige plassar, vert det ny runde med tildeling av restplassar, og påmeldar vert kontakta for vidare oppfølging.  

Når alle plassane er fylt opp, vert det sendt ut avslag til familiar som ikkje får plass på leiropphaldet. Ved avmeldingar rett før leirstart, vert det vurdert om ledige plassar skal tilbydast som restplass.  

Steg 8: Påmeldar og familiar som har fått tildelt plass får tilsendt informasjon om leiropphaldet. Det er viktig at påmeldar går igjennom informasjonen saman med familiane. Påmeldar vert beden om å eventuelt innhente svar frå familiane ang. matomsyn, allergiar, språkkompetanse, transportbehov og andre nødvendige opplysningar.  

Steg 9: Før leiren, får familiane opplyst pakkeliste og informasjon om bussavgang om dei har meldt inn transportbehov.  

Steg 10: Etter leiren er det viktig for oss å få tilbakemelding dersom det er noko som vert opplevd utfordrande eller dersom de fangar opp noko frå familiar som har deltatt som kan vere nyttig for oss som tilbydar å kjenne til.   

Som påmeldar er du både den som sender inn søknaden og bindeleddet mellom oss og familiane. Det betyr at du har ansvar for å formidle vidare om familien har fått plass, står på venteliste eller får avslag på søknaden.

Det er viktig at du hjelper til med at familiane får god og forståeleg informasjon om kva opphaldet inneber, kva reglar som gjeld, og kva dei kan forvente.

Vi ber deg særleg om å gå gjennom leirprogrammet saman med familien. Forklar at oppsette aktivitetstider må følgjast, og at det er nødvendig å gi beskjed til frivillige dersom noko ikkje let seg gjennomføre. Erfaring viser at misforståingar om oppmøte kan skape unødig frustrasjon, og dette kan ein førebygge med god informasjon på førehand.

Ha gjerne tett dialog om pakkeliste og praktiske detaljar kring reisa, slik at familien er godt førebudd og møter til avtalt tid.

For å få plass må familien: 

• ha levd i vedvarende låginntekt i Noreg i 3 år eller meir 

• ha minst eitt barn i alderen 6-13 år 

• ikkje ha tilsvarande ferietilbod 

• klare seg utan behov for tett oppfølging frå våre frivillige.  
  Plass til eigen assistent eller tolk kan avtalast. 

• ha med vaksne som kan norsk godt nok til at opphaldet vert forsvarleg og trygt for alle partar.  

Tildeling av plass føreset at familien er med alle dagane leiren varer. 

Familiar som er i målgruppa som ikkje har delteke før vert prioritert. 

For Røde Kors er det viktig at heile familien reiser saman. Då får familien moglegheit til å dele gode opplevingar og ha felles minner å sjå tilbake på.